اَن بهارهَ کی دِنم باغَ به وَشتَن اَوَره لالَ بو بُلبولَ خو عشقِ به خاندن اَوَره
لاله رِه سرخه لَچک ، جنگل رِه سبزه قبا دشتَ رِه نقشه بزه چین چینه دامن اَوَره
ترکاَنه دانه سَرَ ، وَشکاَفاَنه غُمچه لبَ لُخته بو خاکِه ولی مخمَلَ پیرَن اَوَره
خولی دارانِ سَرَ نازکه حریاَل واَشاَنه گوشواره رَزِ ، یاسِ گوله گردن اَوَره
ناَز دهه ولگانَ با خو خُنَکه بادِ مرهَ عینهو نانو لَسه خالَ به تاَب دَن اَوَره
مُرواَری کاری کُنه آسماَنِ سینهَ باَزین شب تماشا رِه چراَغ سُتکاَیه روشن اَوَره
دیلَ خنده فادَهه ، اِشکَنه غُرصه کَمَرَ آزاَده بُسته خیالانَ به گشتن اَوَره
عاشقی فصله دَپیچسته هوا اَفتاَبِ عطر آدمَ خاَسته و ناخاَسته به بَشکَن اَوَره
#ایرج_قبادی
#نشریه_گیل_رخ
